அயல்துறைக் கொள்கை - சீத்தாராம் யெச்சூரி விளக்கம்

அயல்துறைக் கொள்கையில் ஏற்பட்ட மாற்றமே

உள்நாட்டுக் கொள்கையிலும் மக்கள் மீதான தாக்குதல்கள்

மாநிலங்களவையில் சீத்தாராம் யெச்சூரி விளக்கம்

புதுதில்லி, ஆக. 4-

அயல்துறைக் கொள்கையில் அமெரிக்காவின் இளைய பங்காளியாக மாறியதன் விளைவுதான் உள்நாட்டுக் கொள்கையிலும் மக்கள்மீதான தாக்குதல்கள் அதிகரித்திருப்பதற்குக் காரணங்களாகும் என்று மார்க்சிஸ்ட் கம்யூனிஸ்ட் கட்சியின் பொதுச் செயலாளர் சீத்தாராம் யெச்சூரி கூறினார்.

நாடாளுமன்ற மழைக்காலக்கூட்டத்தொடர் நடைபெற்று வருகிறது. வியாழன் அன்று மாலை இந்தியாவின் அயல்துறைக் கொள்கையும், போர்த்தந்திர பங்காளிகளை ஏற்படுத்திக்கொண்டுள்ளமையும் என்பது குறித்து குறுகிய கால விவாதம் நடைபெற்றது. இதில் பங்கேற்று சீத்தாராம் யெச்சூரி பேசியதாவது:

“மாண்புமிகு துணைத் தலைவர் அவர்களே, இவ்விவாதத்தில் பேச வாய்ப்பளித்தமைக்க முதற்கண் நன்றி தெரிவித்துக் கொள்கிறேன். இது மிகவும் முக்கியமான பிரச்சனையாகும். நம் நாட்டின் எதிர்காலத்திற்கும் மிகவும் உயிர்நாடியானதாகும்.

மிகவும் மோசமான காலகட்டத்தில் நாட்டின் அயல்துறைக் கொள்கையைக் குறித்து நாம் விவாதித்துக் கொண்டிருக்கிறோம். அயல்துறைக் கொள்கை என்பது, உள்நாட்டுக் கொள்கையின் ஒரு விரிவாக்கம்தான் என்பதை நாம்  அனைவரும் நன்கு அறிவோம்.

இந்தியாவின் நலன்களைப் பாதுகாப்பதற்கு, நம் அயல்துறைக் கொள்கை என்னவாக இருக்க வேண்டும்? வரலாற்றுரீதியாக நம் நாட்டின் அயல்துறைக் கொள்கை என்பது, நம்முடைய நாட்டின் நலன்களைப் பாதுகாக்கக்கூடிய விதத்தில், ஒரு சுயேச்சையான அயல்துறைக் கொள்கையாக இருந்து வந்தது. அதற்குத்தான் உச்சபட்ச முன்னுரிமை அளித்து வந்தோம். எனவே நாம் அந்த சமயத்தில், வரலாற்று ரீதியாக,  உலகில் உள்ள வளர்முக நாடுகள் அனைத்திற்கும்,  அணிசேரா இயக்கத்தின் தலைவனாக இருந்து வந்தோம்.  அப்போது நம் சுயேச்சையானக் குரல், அனைத்து  நாடுகளிடையேயும்  மதிப்புடனும் மரியாதையுடனும் கேட்டுக்கொள்ளப்பட்டது. அதேபோன்று உலக அளவில் பல்வேறு பிரச்சனைகளின்மீது நாம் முன்வைத்த கருத்துக்களும் உலக அளவில் கொள்கைகளை  நிர்ணயிப்பதில் செல்வாக்கு செலுத்தியது. நம் முன்னாள் பிரதமர் ராஜீவ் காந்தி  அணு ஆயுதக் குறைப்பு  தொடர்பாக முன்வைத்த முன்மொழிவுகள் இன்னமும் ஐக்கிய நாடுகள் மன்றத்தின் முன் நிலுவையில் இருந்து வருகிறது.  அனைத்து அணு ஆயுதங்களையும் முற்றிலுமாக ஒழித்துக் கட்டுவதன்மீது, இந்தியா தலைமைதாங்கி வழிகாட்டிக் கொண்டிருந்தது.

ஆனால்,  இன்றையதினம் நடந்துகொண்டிருப்பவற்றைப் பார்த்தோ மானால், நம் நாட்டின் ஒட்டுமொத்த அயல்துறைக் கொள்கையின்மீதும் மிகவும் மோசமானமுறையில் முறிவினை ஏற்படுத்திக் கொண்டிருக்கிறோம் என்றே கருதுகிறேன். ஆம், அதன் பின்னர், உலக நிலைமைகளில் மாற்றங்கள் ஏற்பட்டிருக்கின்றன. பனிப் போர் முடிந்துவிட்டது. இப்போது, சர்வதேச அரங்கில் நீங்கள் வித்தியாசமான நாடுகளுடனும், சக்திகளுடனும்  உறவினை ஏற்படுத்திக் கொண்டிருக்கிறீர்கள்.  இந்தியாவை ஆட்சி செய்த அரசாங்கங்கள்  தங்கள் அயல்துறைக் கொள்கைகளில் பல்வேறு பெயர்வுகளைச் செய்திருக்கின்றன. இவ்வாறான பெயர்வுகளால், ஓர் அடிப்படைக்  கேள்வி எழுகிறது. அதாவது, இவற்றில் நம் நலன் எந்த அளவிற்குச் சார்ந்திருக்கிறது? இவ்வாறான மாற்றங்களால், நாம் நம் சுயேச்சையான அயல்துறைக் கொள்கையை இப்போதும் பின்பற்றுகிறோம் என்று சொல்ல முடியுமா? அல்லது உலகில் உள்ள சில வல்லரசுகளைச் சார்ந்திருக்கிறோமா? 

ஒட்டுமொத்த உலகிலும் நிலைமைகள் மாறிக் கொண்டிருக்கின்றன.   இப்போதும் அது தொடர்ந்து கொண்டிருக்கிறது.  உலகை, பனிப்போர் முடிவடைந்துள்ள நிலையில், அமெரிக்கா தன்  ஒரு துருவக் கோட்பாட்டின் (unipolarity) கீழ் கொண்டுவர வேண்டும் என்பதற்கும், உலகில் உள்ள பல்வேறு நாடுகள் அதனை பல்துருவக் கோட்பாடாகவே நீட்டித்திட வேண்டும் என்று விரும்புவதற்கும் இடையிலான போராட்டம் நடந்து கொண்டிருக்கிறது. இந்தப் போராட்டத்தில் இந்தியா பல்துருவக் கோட்பாட்டிற்காகப் போராடும் நாடுகளுடன்தான் கை கோர்த்திட வேண்டும்.  ஆனால், இந்த அரசாங்கத்திற்கு எதிராக என்னுடைய குற்றச்சாட்டு என்னவெனில், நாம் அமெரிக்காவின் கட்டுப்பாட்டில் உள்ள ஒருதுருவக் கோட்பாட்டை நோக்கியே நம் அனைத்து அம்சங்களையும் நகர்த்திக் கொண்டிருக்கிறோம் என்பதாகும். இது எந்தவிதத்திலும் இந்தியாவின் நலன்களுக்கானது அல்ல என்பதே என் கருத்தாகும்.  எனவேதான், இந்தியாவின் பாதுகாப்பு, இந்தியாவின் சர்வதேச எல்லைகள் தொடர்பான பாதுகாப்பு, இந்தியாவின் இறையாண்மை ஆகியவை நமக்கு மிகவும் முக்கியமானவை. இவற்றைப் பாதுகாப்பதில் நமக்கு எவ்விதமான  மாற்றுக்கருத்தும் இருந்திட முடியாது.

நம் நாட்டின் பாதுகாப்பு மற்றும் இறையாண்மையை மீறுவதற்கு எவர் முயன்றாலும், அதனைத் தடுத்து நிறுத்தி நம்மைப் பாதுகாக்கக்கூடிய விதத்தில், இந்தியா இருந்திட வேண்டும். இதில் எவ்வித சமரசத்திற்கும் இடம் கொடுக்க முடியாது. இதில் நாம்  அனைவரும் ஒன்றுபட்டு நிற்க வேண்டும் என்பதே இதன் பொருளாகும். ஆனால், இதனைக் கூறும் அதே சமயத்தில், இந்திய அரசு என்ன செய்து கொண்டிருக்கிறது? உலக அளவில் அமெரிக்காவினால் தலைமை தாங்கப்படும் ஒருதுருவக் கோட்பாட்டிற்கும், பல்வேறு நாடுகளால் விரும்பப்படும் பல்துருவக் கோட்பாட்டிற்கும் இடையே போராட்டம் நடைபெற்றுக் கொண்டிருக்கக்கூடிய இன்றைய சூழ்நிலையில், இந்தியா அமெரிக்காவினால் தலைமை தாங்கப்படக்கூடிய ஒருதுருவக் கோட்பாட்டுடன் தன்னைப் பிணைத்துக்கொண்டிருக்கிறது.  

இவ்வாறு இதற்கு முன்பிருந்த அரசாங்கங்களும் செயல்பட்டதை நாம் பார்த்தோம்தான். அப்போதும் நாங்கள் இதனை முழுமையாக ஒத்துக் கொள்ளவில்லை. ஐமுகூ அரசாங்கம் இருந்த சமயத்திலும் இந்தியா, அமெரிக்காவுடன் ஒரு போர்த்தந்திரக் கூட்டணியை (a strategic partnership) நோக்கி நகர்ந்தது.  இந்திய – அமெரிக்க அணுசக்தி ஒப்பந்தம் செய்துகொள்ள முடிவு செய்தது. அதன் காரணமாக நாங்கள்  அதற்கு அளித்துவந்த ஆதரவினை விலக்கிக் கொள்ள வேண்டியிருந்தது.  ஏனெனில் நாங்கள் ஐமுகூ அரசாங்கத்தை ஆதரிப்பதற்காக உருவாக்கப்பட்டிருந்த குறைந்தபட்ச பொது செயல்திட்டத்தின் ஓர் அங்கமாக அந்த ஒப்பந்தம்  அமைந்திடவில்லை.  எனவேதான் நாங்கள் அதற்கு அளித்துவந்த ஆதரவினைத் திரும்பப் பெற்றுக் கொண்டோம்.   

ஆனால், இன்றைய தினம், அந்த ஒப்பந்தத்தின் கதி என்ன? அந்த ஒப்பந்தத்தால்  இந்தியா என்ன சாதித்திருக்கிறது? இவ்வாறு எதுவும் இந்தியாவிற்கு அமெரிக்காவால் கிடைக்காத நிலையில் இப்போதும்  அதன்மீது எப்படி முழு நம்பிக்கை வைத்துக்கொண்டிருக்கிறீர்கள்?  அந்த அணுசக்தி ஒப்பந்தத்தைத் தொடர்ந்து, இந்தியாவிற்குக் கூடுதலாக ஒரு  மெகாவாட் அளவாவது அணுசக்தி மூலமாக மின்சாரத்தை நாம் பெற்றோம் என்று சொல்ல முடியுமா?  அமெரிக்காவிடமிருந்தாவது  அல்லது ‘உயர்ந்தோர்’ குழாம் என்று கூறப்படும், ‘அணுசக்தி கிளப்’பிடமிருந்தாவது,  அணுசக்தி தொழில்நுட்ப மாற்றம்  நமக்கு நடைபெற்றிருக்கிறதா?  ‘அணு விநியோகஸ்தர்கள் குழுமத்தில்’ (Nuclear Suppliers’ Group) நுழைவதற்காவது அனுமதிக்கப்பட்டிருக்கிறீர்களா? இன்றைய தினம் நம் விஞ்ஞானிகள், இவ்வாறு ராக்கெட்டுகளையும், செயற்கைக்கோள்களையும் விண்ணில் அனுப்பமுடிகிறதென்றால், அதற்கு அவர்களின் சொந்தத் திறமைதான் காரணமாகும். எந்த அயல்நாட்டின் ஒத்துழைப்பாலும் அவர்கள் இந்தத் திறனை வளர்த்துக்கொள்ளவில்லை.

எனவே, இவ்வாறு நம் திறமைகளை வளர்த்துக்கொள்வதற்குப் பதிலாக, ஒருதுருவக் கோட்பாட்டிற்கும், பல்துருவக் கோட்பாட்டிற்கும் இடையே நடைபெறும் போராட்டத்தில் நாம் ஒருதுருவக்கோட்பாட்டினைச் சார்ந்திருக்கிறோம்.

ஐமுகூ அரசாங்கம் சர்வதேச அளவில் மேற்கொண்ட பல நடவடிக்கைகளுக்காக  நாங்கள் பாராட்டப்பட்டிருக்கிறோம்.  இந்தியா, பிரேசில் மற்றும் தென் ஆப்ரிக்க நாடுகளின் கூட்டணி என்கிற ‘இப்சா(IBSA)’ அமைக்கப்படுவதற்கு நாங்கள் கேந்திரமான பங்களிப்பினைச் செய்திருக்கிறோம். அதேபோன்று ‘பிரிக்ஸ்’ (‘BRICS’) எனப்படும் இந்தியா, பிரேசில், தென் ஆப்ரிக்கா, சீனா மற்றும் ருஷ்யா ஆகிய நாடுகள் கூட்டணிக்கு நாம் மிக முக்கிய பங்களிப்பினை ஆற்றியிருக்கிறோம்.  இவ்வாறு  பல்துருவக் கோட்பாடு என்பது இயற்கையானதாகும்.  உலகம்  அதனை நோக்கிதான் நகர வேண்டும்.

ஆனால், இப்போது, கடந்த மூன்றாண்டுகளில்  இந்தியா எந்த அளவிற்குத் தன்னைச் சுருக்கிக் கொண்டிருக்கிறது? இவ்வாறு நான் கூறுவதற்கு என்னை மன்னிக்க வேண்டும். இப்போது இந்தியா, உலக அளவில் அமெரிக்காவின் இளைய பங்காளியாக  மாறியிருக்கிறது என்றே நான் பார்க்கிறேன். அமெரிக்காவுடன் நாம் செய்துகொண்டுள்ள ஒப்பந்தங்களின் அடிப்படையிலேயே இவ்வாறு நான் கூறுகிறேன்.  ஐந்து தடவைகள் நம் பிரதமர் அங்கே சென்றிருக்கிறார். ஐந்தாவது தடவை அவர் சென்ற போது, என்ன நடந்தது? நான் அதற்குச் சற்றே பின்னால் வருகிறேன். நான்காவது தடவை அவர் சென்றபோது, ஓர் ஒப்பந்தம் கையெழுத்தாகியுள்ளது. உண்மையில்  அது நம்மை மிகவும் சங்கடத்திற்குள்ளாக்கியுள்ளது. ‘லீமா’ (‘LEMA’) எனப்படும் கடல்வழி மற்றும் வான்வழி பரிவர்த்தனை புரிந்துணர்வு ஒப்பந்தம் (Logistics Exchange Memorandum of Agreement) என்பது குறித்து நமக்கு எதுவுமே தெரியாது.  இந்த ஒப்பந்தத்தில் உள்ள நிபந்தனைகள் என்ன என்று நமக்கு எதுவுமே தெரியாது. இந்த ஒப்பந்தம் நம் நாடாளுமன்றத்தின் இரு அவைகளிலும் முன் வைக்கப்படவில்லை.  இங்கே இந்த ஒப்பந்தம் குறித்து எதுவும் விவாதிக்கப்படவில்லை. ஆனால் அமெரிக்காவில் உள்ள செனட் சபையில் 2017ஆம்  ஆண்டு தேசியப் பாதுகாப்பு அதிகாரத்துவ சட்டம் (2017 National Defence Authorization Act) என்பதன் ஓர் அங்கமாக அமெரிக்க செனட் சபையின் ஏற்பளிப்பு இதற்குத் தேவைப்பட்டிருக்கிறது.  அங்கே அது விவாதிக்கப்பட்டிருக்கிறது. அந்த ஒப்பந்தத்தில் என்ன அடங்கியிருக்கிறது என்பதை அவர்களின் இணையதளத்திலிருந்துதான் நம்மால் தெரிந்துகொள்ள முடிந்தது. இந்த ஒப்பந்தம் குறித்து அவர்கள் என்ன கூறுகிறார்கள்? அவர்கள், இதன் மூலமாக இந்தியா, நம்முடைய மிகப்பெரிய ராணுவக் கூட்டாளியாக, மிகவும் நெருக்கமான ராணுவக் கூட்டாளியாக,  மாறியிருக்கிறது என்று சொல்லியிருக்கிறார்கள். இதன் பொருள் என்ன?

அவர்களுடைய இணையதளத்தில் இதுதொடர்பாக உள்ள அறிக்கையில், 12(9)(2)ஆவது பிரிவில் ‘ஈ’ (‘E’) பத்தியில், “ராணுவப் பொருட்களின் பாதுகாப்பை சரிபடுத்திக்கொள்வதற்கான ஏற்பாடுகள், சைபர் பாதுகாப்பு மற்றும் பல்வேறு ஒப்பந்தங்கள் தொடர்பாக ராணுவ சேவைகளின் தொழில்நுட்பங்களைத் தெரிந்து கொள்ளுதல் ஆகியவற்றுடன் இந்தியாவை அமெரிக்க ஆயுதங்களைக் கொள்முதல் செய்வதற்கு ஏற்ப ஒழுங்குபடுத்தியிருத்தல்,” என்று கூறப்பட்டிருக்கிறது.  எந்த அளவிற்கு நம் நாட்டின் இறையாண்மை சரண்செய்யப்பட்டிருக்கிறது என்று பாருங்கள். இந்த ஒப்பந்தத்தில் மேலும் என்னவெல்லாம் கூறப்பட்டிருக்கிறது, தெரியுமா? நாம் இங்கே, நாட்டின் இறையாண்டை, பாதுகாப்பு ஆகியவை எவருடனும் சமரசம் செய்துகொள்வதற்கில்லை என்று பேசிக்கொண்டிருக்கிறோம். ஆனால்  இந்த ஒப்பந்தத்தில் என்ன கூறப்பட்டிருக்கிறது, தெரியுமா? அதில் என்ன எழுதியிருக்கிறது என்று  நான் படிக்கிறேன்.  “தெற்காசியா மற்றும் பெரிய அளவில் இந்திய – ஆசிய பசிபிக் பிராந்தியத்தில், அமெரிக்காவின் நலன்களை முன்னெடுத்துச் செல்லக்கூடிய விதத்தில், ‘முன்னெடுத்து’ என்கிற சொல்லைத் தயவுசெய்து அடிக்கோடிட்டுக்கொள்ளுங்கள், இந்தியாவின் ராணுவம் மற்றும் பாதுகாப்பு ஒத்துழைப்பு கிடைத்திடும்.”  ஆகவே, இப்போது நாம், அமெரிக்காவின் இளைய பங்காளி என்ற முறையில், நம்முடைய அண்டை நாடுகளில் அமெரிக்கா எடுத்திடும் அத்துணை போர்த் தந்திர நடவடிக்கைகளுக்கும் அதன் சொல்படி கேட்டு நடந்திடும் ஏவலாளாக மாறியிருக்கிறோம்.  இவ்வாறு நம் சுயேச்சையான அயல்துறைக் கொள்கையை சவப்பெட்டிக்குள் அடைத்துவைத்து கடைசி ஆணியும் அடிக்கப்பட்டுவிட்டது. இந்த அரசாங்கம் இவ்வாறு மேற்கொண்டு பல்வேறு நடவடிக்கைகளையும் பார்த்தபின்னர்  கனத்த இதயத்துடன் இதை நான் கூறுகிறேன். 

இவ்வாறு அமெரிக்காவின் கட்டளைக்கிணங்க பல்வேறு துறைகளை நாம் மாற்றி அமைத்துக்கொண்டிருப்பதன் காரணமாக பலதுறைகளிலும் அவற்றின் பாதிப்புகளை இப்போது நம்மால் பார்க்க முடிகிறது. 

நமது பிரதமர் 65 தடவைகள் உலகத்தைச் சுற்றி வந்திருக்கிறார். ஆனால் ஒருதடவையாவது, தன் சுற்றுப்பயணத்தின் விவரம் குறித்து இந்த அவைக்கு அவர் தெரிவித்திருக்கிறாரா?  நம்  அயல்துறை அமைச்சர், மாண்புமிகு சுஷ்மா ஸ்வராஜ், தான் அயல்நாடுகளுக்கு சென்றுவந்தபின் அதன் விவரங்களை கலந்தாலோசனைக் குழுக் கூட்டத்திற்கு ஏற்பாடு செய்து என்ன நடந்தது என்று கூறிவிடுவார். அதற்காக அவரை நான் பாராட்டுகிறேன். ஆனாலும், அவரும் இந்த அவையில் அவற்றைத் தெரிவித்ததில்லை.

 சுஷ்மா ஸ்வராஜ் (அயல்துறை அமைச்சர்): நான்  அதனை முறையாகச் செய்துகொண்டிருக்கிறேன்.

சீத்தாராம் யெச்சூரி: இவ்வாறு இந்தியா, அமெரிக்காவின் இளைய பங்காளியாக மாறியபின், அது நம் பொருளாதாரக் கொள்கைகளிலும் பிரதிபலிக்கத் தொடங்கிவிட்டன. அனைத்துத் துறைகளில் அந்நிய முதலீடுகள் 100 சதவீதம் அளவிற்கு அனுமதித்திருக்கிறோம். இப்போது ரயில்வேயையும் தனியாருக்குத் தாரை வார்க்கத்தொடங்கிவிட்டீர்கள். ஏர் இந்தியா நிறுவனம் தனியாருக்குத் தாரை வார்க்க நடவடிக்கை எடுக்கப்பட்டு வருகிறது. ராணுவத் தளவாடங்கள் கொள்முதலில் தனியார் அனுமதிக்கப்பட்டிருக்கிறார்கள். இவற்றின் இறுதி விளைவு என்னவாகும்?  

மோடி பிரதமரானபின் கடந்த மூன்றாண்டுகளில் இந்த அரசாங்கம் சுமார் 1.1 கோடி ரூபாய் அளவிற்கு ராணுவத்துறையில் அந்நிய நேரடி முதலீடு வந்திருக்கிறது.  இப்போது பிரதமர் மோடி அமெரிக்காவிற்கு ஐந்தாவது தடவையாக சென்றுவந்தபின், மே மாதம் வரை எவ்விதமான அந்நிய முதலீடும் வரவில்லை.  இந்த நாட்டில் 2016-17இல் அந்நிய முதலீடு 1,000 டாலர்களாக இருந்தது. இது 2014-15இல் 78 ஆயிரம் டாலர்களாக இருந்தது. இவை யனைத்துக்குப் பின்னரும், இந்த ஒப்பந்தத்தின்மூலமாக நீங்கள் என்ன சாதித்திருக்கிறீர்கள்?  நம் நாட்டின் ராணுவ உற்பத்தில் 49 சதவீத அளவிற்கு அந்நிய முதலீட்டுக்கு வழிதிறந்துவிட்டிருக்கிறீர்கள். இது நம்முடைய நலனுக்காக என்று சொல்ல முடியுமா?  நம்முடைய ராணுவ வசதிகளை ஆய்வு செய்வதற்கு  அமெரிக்காவை மட்டுமல்ல, எந்த நாடு வேண்டுமானாலும் ஆய்வு செய்திடலாம் என்று செய்து வைத்திருக்கிறீர்களே. இது நம் நாட்டின் நலனுக்காகவா?   

இதுவரை நம் நாட்டின் ராணுவத் தளவாடங்களை உற்பத்தி செய்து வந்த டிஆர்டிஓ (DRDO-Defence Research and Development Organization) என்னும் ராணுவ ஆராய்ச்சி மற்றும் வளர்ச்சி ஸ்தாபனம், இனி இஸ்ரேலுடன் நெருக்கமான முறையில் ஒத்துழைத்திடும். இது நம்முடைய நலனுக்காகவா? நான் கேட்க விரும்பும் கேள்வி இதுதான்.  பிரதமர் மோடி, ஐந்தாவது தடவையாக அமெரிக்கா சென்றுவந்தபின், இந்தியாவின் பாதுகாப்பிற்காக நாம் என்ன பெற்றிருக்கிறோம்.  நாம் எச்1 விசா தொடர்பாக எவ்வித உறுதிமொழியையும் அமெரிக்காவிடமிருந்து பெறவில்லை என்று பல உறுப்பினர்கள் இங்கே குறிப்பிட்டார்கள். அமெரிக்காவில் சிலிகான்  பள்ளத்தாக்கில் ஐந்து லட்சத்திற்கும் மேற்பட்ட நம் நாட்டு இளைஞர்கள் பணிபுரிகிறார்கள். அவர்கள் தொடர்ந்து அங்கே பணியாற்றுவது இன்றைக்குக் கேள்விக்குறியாகி இருக்கிறது. ஆனால், இப்போதும் நீங்கள் அமெரிக்க ஜனாதிபதி டிரம்பை நம்பிக்கொண்டிருக்கிறீர்கள்.

டிரம்ப் தன்னுடைய எழுபது நாட்கள் பதவியை நிறைவு செய்ததைத்தொடர்ந்து லாஸ் ஏஞ்சல்ஸ் டைம்ஸ் ஏட்டில் வெளியாகியுள்ள செய்தியைப் படிக்கிறேன், கேளுங்கள். அந்த ஏட்டின் தலையங்கம் என்ன எழுதியிருக்கிறது என்று படிக்கிறேன். “ஜனாதிபதி டிரம்ப் ஆட்சிக்கு வந்தபின்னர் ஏதாவது செய்வார் என்று மற்ற பல அமெரிக்கர்களைப்போலவே நாமும் எதிர்பார்த்தோம். ஆனால் இந்த எழுபது நாட்களில் எதுவுமே நடக்கவில்லை. இனிவரக்கூடிய 1400 நாட்களும் அப்படித்தான் இருக்கப்போகிறதோ என்றே தோன்றுகிறது,” இவர்கள்தான் அமெரிக்கர்கள். ஆயினும் அமெரிக்க ஜனாதிபதி நம் அபிலாசைகளைத் தீர்த்துவைப்பார் என்று நம்புகிறோம். இந்தப் பின்னணியில்தான் என்னை மிகவும் சங்கடத்திற்குள்ளாக்கிய விஷயம் என்னவெனில், இந்தியா அமெரிக்காவின் இளைய பங்காளியாக மாறியது மட்டுமல்ல, அதனை பிரதமர் மோடி, இஸ்ரேலுக்குப் பயணம் செய்ததன் மூலம் மிகவும் உறுதிப்படுத்தியிருப்பதுமாகும். இப்போது இஸ்ரேல் சென்றபோது ஏழு ஒப்பந்தங்களில் கையெழுத்திட்டிருக்கிறார். அவை என்னவென்று நான் தெரிந்துகொள்ள விரும்புகிறேன். 

பாலஸ்தீனத்திற்கு செல்லாதது மட்டுமல்ல பாலஸ்தீனத்தை இழிவுபடுத்தக்கூடிய விதத்தில் பிரதமர் மோடி பேசியிருப்பதாகவும் ஊடகங்களில் செய்திகள் கசிந்திருக்கின்றன. இவ்வாறு இவர் பேசியிருப்பதன்மூலமாக நம் சுயேச்சையான அயல்துறைக் கொள்கை சவப்பெட்டிக்குள் வைக்கப்பட்டு கடைசி ஆணியும்  அடிக்கப்பட்டுவிட்டது.

பாலஸ்தீனத்திற்கும் நமக்கும் இருந்த ஒருமைப்பாடு என்பது  நாம் சுதந்திரம் வாங்குவதற்கு முன்பே தொடங்கிவிட்டது. சுதந்திரப் போராட்டக் காலத்தில் மகாத்மா காந்தி என்ன கூறினார்? “எப்படி ஆங்கிலேயர்களுக்கு இங்கிலாந்து இருக்கிறதோ, எப்படி பிரெஞ்சுக்காரர்களுக்கு பிரான்ஸ் இருக்கிறதோ அப்படி பாலஸ்தீனர்களுக்கு பாலஸ்தீனம்” என்று கூறினார்.  பாலஸ்தீனத்தின் நிலப்பகுதிகள் சட்டவிரோதமாக ஆக்கிரமிக்கப்பட்டிருப்பது குறித்து ஒரு வார்த்தை கூட பேசவில்லை. மேலும், இந்தியா தற்போது அதிக அளவில் ராணுவ தளவாடங்களை இஸ்ரேலிடமிருந்துதான் இறக்குமதி செய்கிறது.  இவ்வாறு இந்தியா இன்றைய தினம் உலக விவகாரங்களில் தன்னுடைய அணுகுமுறையை முழுமையாக மாற்றி அமைத்துக் கொண்டிருக்கிறது.

இதனால் என்ன ஆதாயம் இந்தியாவிற்கு ஏற்பட்டிருக்கிறது? நம்முடைய பொருளாதாரக் கொள்கைகளில் அந்நிய மூலதனத்திற்கு வழிதிறந்து விட்டிருக்கிறீர்கள், ரூபாய் நோட்டுகள் செல்லாது என்ற உங்கள் அறிவிப்பு, ஜிஎஸ்டியை நீங்கள் கொண்டுவந்திருக்கும் முறை இவை அனைத்துமே  பன்னாட்டு நிறுவனங்கள் கொள்ளை லாபம் ஈட்டுவதற்கு வசதி செய்து தந்திருக்கிறது.

ரூபாய் நோட்டுகள் செல்லாது என்று அறிவித்ததைத்தொடர்ந்து டிஜிடல் முறையில் பணப் பரிவர்த்தனைக்கு மாறுங்கள் என்றீர்கள். இதனால் லாபம்  அடையக்கூடிய உலக அளவிலான டிஜிடல் கம்பெனிகள் எவை? ஜிஎஸ்டியைத் தொடர்ந்து, ஒவ்வொரு டிஜிடல் பரிவர்த்தனைக்கும் 18 சதவீதம் பரிவர்த்தனைக் கட்டணமாக வழங்கிட வேண்டும். ஒரு 100 ரூபாய் நோட்டு, ஒரு லட்சம் தடவைகள்  கைமாறினால், ரொக்க மதிப்பில் அதற்கு எந்த மாற்றமும் ஏற்பட்டுவிடாது.  தொடர்ந்து அது 100 ரூபாயாகவே இருந்திடும். ஆனால் அதுவே டிஜிடல் பரிவர்த்தனை மூலமாக இலட்சம் தடவைகள் 18 சதவீத பரிவர்த்தனைக் கட்டணத்துடன்  மாற்றப்பட்டால், பின்னர் 18 லட்சம் ரூபாய் லாபம் அந்த டிஜிடல் கம்பெனிக்குச் சென்றடைந்திடும். ஆனால் ரூபாய் நோட்டின் மதிப்பு மட்டும் 100 ஆகவே தொடரும். நாம் என்ன செய்து கொண்டிருக்கிறோம்?

அந்நிய மூலதனத்தைக் குஷிப்படுத்துவதற்காக நீங்கள் உங்கள் சொந்த நாட்டு மக்கள்மீது சுமைகளை ஏற்றிக்கொண்டிருக்கிறீர்கள். மாறாக நம் நாட்டிற்கு எதுவுமே வரப்போவதில்லை.

உலகப் பொருளாதார நெருக்கடி 2008இல் ஏற்பட்டபின்னர், மேற்கத்திய நாடுகள் எதற்காக ஏங்கின? அமெரிக்கா எதற்காக ஏங்கியது? அவை சந்தைகளுக்காக ஏங்கின. மலிவான  வள ஆதாரங்களுக்காக ஏங்கின. இப்போது அவற்றின் ஆதாயங்களுக்காக நீங்கள் இந்திய சந்தையைத் திறந்து விட்டிருக்கிறீர்கள். நம் மக்களைக் கசக்கிப்பிழிந்து  அவர்கள் நெருக்கடியைத் தீர்த்துக்கொள்ள வசதி செய்து தந்திருக்கிறீர்கள்.

இவ்வாறு நம் அயல்துறைக் கொள்கை நம்மை எங்கே இழுத்துச் சென்றுகொண்டிருக்கிறது? அயல்துறைக் கொள்கையின் மிக முக்கியமான கூறு, நம் உறவுகள் அண்டை நாடுகளுடன் எப்படி இருக்கிறது என்பதாகும்.   அண்டை நாடுகளுடன் நம் உறவு இப்போது எப்படி  இருக்கிறது?

நேபாளம்

நேபாளத்தை எடுத்துக் கொள்ளுங்கள்.  இந்தியர்களும், நேபாளியர்களும் அண்ணன் – தம்பி போல அல்ல, மாறாக இரட்டையர் போல வாழ்ந்து வந்தோம். ஒருவரின் வலி மற்றவருக்குத் தெரியும். ஒருவரின் சந்தோஷம், மற்றவரின் சந்தோஷமாக இருந்து வந்தது. இன்றையதினம் அந்த நாட்டில் என்ன நடந்து கொண்டிருக்கிறது? நேபாள நாடாளுமன்றம் தங்கள் நேபாள அரசமைப்புச் சட்டத்தை நிறைவேற்றி 22 மாதங்களாகின்றன.  அவர்கள், அவர்களுடைய அரசமைப்புச் சட்டத்தை நிறைவேற்றுகிறார்கள்.  அதில் நமக்கு ஒத்துப்போகாத அம்சங்கள் இருக்கலாம். நாம் அதனை ராஜீயரீதியாக எடுத்தக்கொண்டிருக்க வேண்டும். ஆனால்  நேபாளத்தில் உள்ள பொதுக் கருத்து என்னவென்றால், இந்தியா தங்கள் விவகாரங்களில் தலையிடுகிறது என்பதாகும்.  ஏன் இவ்வாறான நிலை எழுந்துள்ளது? ஏனென்றால், நேபாளத்தில் மன்னராட்சி முறை மீண்டும் வரவேண்டும் என்று இந்தியா விரும்புகிறது. ஏனெனில், உலகில் இருந்த ஒரேயொரு இந்து ராஷ்ட்ரமாக அது இருந்து வந்தது. இவ்வாறு அங்கே இந்திய எதிர்ப்பு உணர்வு வளர்ந்தால், அது நம் நாட்டின் நலனுக்கு உகந்ததா?

வங்க தேசத்தில் என்ன நடந்து கொண்டிருக்கிறது? அந்நாட்டின் பிரதமர் வருகிறார். அங்கே விரைவில் பொதுத் தேர்தல் நடக்க இருக்கிறது.  அந்த நாட்டுடன் சில ஒப்பந்தங்களைப் போட்டிருந்தோம். அவை இன்னமும் நிறைவேறவில்லை. இதனால் அங்கே நம் நாட்டிற்கு எதிராக அதிருப்தி மனப்பான்மை வளர்ந்து வருகிறது. இது இந்தியாவின் நலனுக்கு உகந்தது அல்ல.

பாகிஸ்தானின் நிலைமை என்ன?  இப்போது திடீரென்று அறிவிப்பு வந்திருக்கிறது, எனக்கு ஆச்சர்யமாக இருக்கிறது. அதுகுறித்து அயல்துறை அமைச்சர் விளக்குவார் என நம்புகிறேன். இருநாட்டின் தேசியப் பாதுகாப்பு ஏஜன்சிகளும் பேச்சுவார்த்தைகள் நடத்திக்கொண்டிருக்கின்றன என்பதாகும். இது உண்மையானால், பாகிஸ்தான் மண்ணிலிருந்து பயங்கரவாதநடவடிக்கைகள் நிறுத்தப்படாதவரை பேச்சுவார்த்தைக்கு இடமில்லை என்று சொல்லிவந்தது என்னவாயிற்று? இப்போது  பேச்சுவார்த்தைகள் நடக்கிறதா?  இல்லையா? பதான்கோட்டில் ஐஎஸ்ஐ-ஐ அனுமதித்தீர்கள். நாம் என்ன திரும்பப் பெற்றோம்? சர்ஜிகல் ஸ்ட்ரைக் நடத்தினீர்கள்.  வந்துள்ள செய்திகளின்படி இறந்த நம் வீரர்கள் எண்ணிக்கை இரண்டு மடங்கானது. என்ன கொள்கையை நீங்கள் பின்பற்றிக் கொண்டிருக்கிறீர்கள்?

இப்போது சீனத்துடன்  மோதல் போக்கு.  ராஜீய பேச்சுவார்த்தைகளின் மூலம் இரு நாட்டுப் பிரச்சனைகளையும் பேசித்தீர்த்துக்கொள்ள வேண்டும் என்கிற அரசின் கொள்கைமுடிவோடு நாங்கள் நூறு சதவீதம் உடன்படுகிறோம். இது சீனாவுடன் மட்டுமல்ல. இக்கொள்கைமுடிவை ஆழமாகப் பரிசீலனை செய்திடுங்கள்.

இந்த ஆண்டு நீங்கள் மலபார் பயிற்சியை நடத்தி இருக்கிறீர்கள். மலபார், அரபிக்கடலில் இருக்கிறது. ஆனால் பயிற்சியை வங்காள விரிகுடாவில் நடத்தி இருக்கிறீர்கள். இதன் பொருள் என்ன? யாருடன் செய்திருக்கிறீர்கள்? அமெரிக்காவுடனும், ஜப்பானுடனும். கூட்டு ராணுவ பயிற்சியை  அமெரிக்கா, ஜப்பான், இந்தியா சேர்ந்து செய்திருக்கிறது. இதன் மூலம் தென்கிழக்கு ஆசியா, மற்றும் தெற்காசியாவில் உள்ள நாடுகளுக்குக் குறிப்பாய் நீங்கள் சொல்ல விரும்புவது என்ன? இரு நாடுகள் தங்களுக்கு எதிராக ஒரு பொது எதிரி இருக்கிறார் என்று கருதினால் அவருக்கு எதிராக இத்தகைய கூட்டு ராணுவ பயிற்சிகளை நடத்திடும். அமெரிக்கா, ஜப்பான், இந்தியா ஆகிய நாடுகளுக்கு இடையே, வங்காள விரிகுடாவில்,  பொது எதிரி யார்? இதனை இதனைச் சுற்றியுள்ள நாடுகள் புரிந்து கொள்ளாது என்று நீங்கள் நினைக்காதீர்கள்.

தயவுசெய்து நம்  அண்டை நாடுகளுடன் சுமுகமான உறவுகளை வைத்துக்கொள்ளப் பாருங்கள். அண்டை நாடுகளுடன் நல்லுறவு நீடிப்பது அயல்துறைக் கொள்கையின் அடித்தளமாக அமைந்திட வேண்டும். நம்  அண்டை நாடுகளுடன் என்ன நடந்துகொண்டிருக்கிறது என்பதையும், உலக அளவில் என்ன நடந்துகொண்டிருக்கிறது என்பதையும் மறுபரிசீலனை செய்திடுங்கள். அமெரிக்க – இஸ்ரேல் – இந்தியா கூட்டணி நம் நாட்டின் நலனுக்கானது அல்ல. இது நாம் இப்போது பெற்றிருக்கும் நம் கூட்டணி நாடுகளின் நலன்களுக்கும் ஏற்புடையது அல்ல. இவற்றை இந்த அரசு ஏற்றுக்கொள்ள வேண்டும் என்று விரும்புகிறேன்.”

இவ்வாறு சீத்தாராம் யெச்சூரி பேசினார்.

(தமிழில்: ச.வீரமணி)

சமூகரீதியாக, பொருளாதாரரீதியாக பிற்படுத்தப்பட்டவர்களுக்கு இந்த அரசு எதுவுமே செய்ததில்லை

மாநிலங்களவையில் டி.கே.ரெங்கராஜன் தாக்கு

புதுதில்லி, ஆக.1-

இந்த அரசு சமூகரீதியாக, பொருளாதார ரீதியாக பிற்படுத்தப்பட்ட வகுப்பினருக்கு எதுவுமே செய்ததில்லை என்றும், பாதையை மாற்றிக்கொள்ளுங்கள் என்றும் மார்க்சிஸ்ட் கம்யூனிஸ்ட் கட்சியின் மாநிலங்களவை உறுப்பினர் டி.கே.ரெங்கராஜன் இந்த அரசாங்கத்தைக் கேட்டுக் கொண்டார்.  

நாடாளுமன்ற மழைக்காலக் கூட்டத்தொடர் நடைபெற்று வருகிறது. திங்கள் அன்று மாநிலங்களவையில்  2017ஆம் ஆண்டு பிற்படுத்தப்பட்ட வகுப்பினருக்கான தேசிய ஆணையம் (ரத்து) சட்டமுன்வடிவின்மீது விவாதம் நடைபெற்றது. அதில் பங்கேற்று டி.கே.ரெங்கராஜன் பேசியதாவது:

“மாண்புமிகு துணைத்தலைவர் அவர்களே, இதன்மீது பேச வாய்ப்பளித்தமைக்கு முதற்கண் நன்றி தெரிவித்துக் கொள்கிறேன்.

இந்தச் சட்டமுன்வடிவை உருவாக்கிய தெரிவுக்குழுவின் தலைவர் பூபேந்தர் யாதவ்விற்கு என் நன்றியைத் தெரிவித்துக் கொள்கிறேன். இந்தச் சட்டமுன்வடிவின்மீது அபரிமிதமான அறிவுடன் திகழும் அமைச்சர் ஜெஹ்லாத்திற்கும் நன்றி தெரிவித்துக் கொள்கிறேன். இதன்மீது பல விஷயங்களை ஒப்புக்கொள்ள மறுப்பதில் நாம் ஒத்துப்போனபோதிலும், தெரிவுக்குழுவில் இதன் நடவடிக்கைகளை மிகவும் அருமையாக அவர் நடத்தினார். அறிவிற்சிறந்த பெருமக்கள் தெரிவுக்குழு முன் ஆஜராகி தங்கள் கருத்தக்களைப் பதிவு செய்திருக்கிறார்கள். அவை அனைத்தும் ஏற்கனவே அவையின்முன் வைக்கப்பட்டுவிட்டன. இதற்காக அவைக்கு நாம் ஒவ்வொருவரும் நன்றி சொல்லக் கடமைப்பட்டிருக்கிறோம். முக்கியமாக மண்டல் கமிஷன்  அறிக்கையைத் தயார் செய்த, ஓய்வுபெற்ற ஐஏஎஸ் அதிகாரி பி.எஸ். கிருஷ்ணன்,  இந்தக்குழுவின் முன் ஆஜரானார். திராவிடக் கழகத்தின் தலைவர் கி.வீரமணி இந்தக் குழுவின் முன் ஆஜரானார். அவர் இக்குழுவின் முன் சாட்சியம்  அளித்தார்.

தெற்கு, வடக்கிலிருந்து வேறுபட்டது என்பதை இங்கே உள்ள அனைவரும் புரிந்துகொள்ள வேண்டும் என்று கேட்டுக்கொள்கிறேன். மாண்புமிகு அமைச்சர் இதனைக் குறித்துக்கொள்ள  வேண்டும் என்று கேட்டுக்கொள்கிறேன்.

1920களில் நடந்தவைகளை நாம் திரும்பிப் பார்த்தோமானால், மைசூர் மகாராஜா பிற்படுத்தப்பட்டவர்கள் மீது இரக்கம் காட்டத் தொடங்கினார், அவர்களுக்குக் கல்வி அளித்தார், அவர்களுக்கு வேலைவாய்ப்பினை அளித்தார். பின்னர், நாம் தமிழ்நாட்டைத் திரும்பிப் பார்த்தோமானால், மாண்புமிகு உறுப்பினர்கள் முத்துக்கருப்பன்  மற்றும் டி.கே.எஸ். இளங்கோவன் மிகச்சரியாகச் சுட்டிக்காட்டியதுபோல, அது ஓர் அற்புதமான மாநிலமாகும். கடந்த 80 முதல் 90 ஆண்டு காலமாக அது பிற்படுத்தப்பட்டவர்களுக்காகப் போராடி வந்தது. இந்த அவை திராவிடக் கழகத் தலைவர் தந்தை பெரியாருக்கு மரியாதை செலுத்திட வேண்டும். அவர், பிற்படுத்தப்பட்டவர்களுக்காகவும், இதர பிற்படுத்தப்பட்டவர்களுக்காகவும் அல்லும்பகலும் அயராது பாடுபட்டு வந்தார். அவர் அதில் சமரசமே செய்து கொள்ளவில்லை. அதுதான் தந்தை பெரியார்.

தந்தை பெரியார் மிகவும் சரியானமுறையில் போராட்டம் நடத்தி, வகுப்புவாத அரசாணையைப் பெற்றுத்தந்தார். வகுப்புவாத முதல் அரசாணை திராவிடக் கழகத்தாலும் தந்தை பெரியாராலும் பெறப்பட்டது.

கேரளாவிற்குச் சென்றோமானால், அங்கே நாராயணகுரு அவர்கள் அனைத்துப் பிற்படுத்தப்பட்டவர்களின் மேம்பாட்டிற்காகவும்  வாழ்ந்து வந்தார். அவர்களின் மேம்பாட்டிற்காகப் போராடி, அவற்றைப் பெற்றார். கேரளாவில் கல்வியின் அளவு என்னவென்பதை இப்போது நீங்கள் பார்த்துக் கொண்டிருக்கிறீர்கள்.  இன்றையதினம் இவ்வாறு கேரளாவும், தமிழகமும் எப்படி முதல் மாநிலங்களாகத் திகழ்கின்றன. நாராயண குருவும், தந்தை பெரியாரும், தொடர்ந்து வந்த தமிழக  அரசாங்கங்களும் மேற்கொண்ட நடவடிக்கைகள்தான் அவற்றிற்குக் காரணங்களாகும்.  திமுக அரசாங்கம், அஇஅதிமுக அரசாங்கம் ஆகிய இரண்டுமே இதர பிற்படுத்தப்பட்ட வகுப்பினர்களுக்காக எண்ணற்ற பணிகளைச் செய்திருக்கின்றன.

ஜெய்ராம் ரமேஷ்: காமராஜரும்தான்.

டி.கே.ரெங்கராஜன்:  காமராஜர் மதிய உணவுத் திட்டத்தைக் கொண்டுவந்தார். அதன்காரணமாக தமிழ்நாட்டில் குழந்தைத் தொழிலாளர்கள் எண்ணிக்கை குறைந்தது,

ஜெய்ராம் ரமேஷ்: இதனை காமராஜர்,  திமுக, அஇஅதிமுக அரசாங்கங்கள் வருவதற்குமுன்பே செய்தார்.

டி.கே.ரெங்கராஜன்: நான் என்னுடைய நண்பர் ஜெய்ராம் ரமேஷின் கூற்றை ஒப்புக்கொள்கிறேன்.  ஆனால் வட இந்தியாவின் நிலை என்ன? இப்போதும்கூட 27 சதவீத இட ஒதுக்கீடு முழுமையாக அமல்படுத்தப்படவில்லை.  இது நமக்கு அவமானம் இல்லையா?  எனவேதான் இந்த அவையின்முன்பு மிகச் சரியானமுறையில் எங்கள் கருத்துக்களைப் பதிவு செய்துகொண்டிருக்கிறோம்.

சமூகரீதியாகவும், பொருளாதார ரீதியாகவும் பிற்படுத்தப்பட்ட வகுப்பினரை  அடையாளம் காண்பதற்கு மாநில அரசாங்கங்களுக்கு அதிகாரங்கள் வேண்டும். தில்லியிலிருந்துகொண்டு எல்லாவற்றையும் நீங்கள் அடையாளம் கண்டுபிடித்திட முடியாது. அல்லது, இங்கேயுள்ள அதிகார வர்க்கம் எல்லாவற்றையும் அடையாளம் கண்டிட முடியாது. 

உச்சநீதிமன்றம், 1992 நவம்பர் 16 அன்று மண்டல் வழக்கில் அளித்துள்ள முத்திரை பதித்த தீர்ப்பில், 1990ஆம் ஆண்டின் ஆணையின் செல்லுபடித் தன்மையை உறுதிசெய்தது.   அதன்பின்னர் உச்சநீதிமன்றம் முன் நிபந்தனைகளாகப் பிறப்பித்த இரு கட்டளைகளும் நிறைவேற்றப் பட்டிருக்கின்றன.   இவை அனைத்தையும் இந்தச்சட்டமுன்வடிவிற்குள் நீங்கள் கொண்டுவந்து இணைக்காவிட்டால், அவ்வாறு இதனை நீங்கள் சட்டமாக்காவிட்டால், பின்னர் எவராவது உச்சநீதிமன்றத்திற்குச் செல்வார்கள், இதற்கு எதிராக வழக்குத் தொடுப்பார்கள். அது மற்றுமொரு குறுக்கீட்டிற்கு வழி வகுத்திடும்.

இந்தச்சட்டமுன்வடிவு, சமூகரீதியாகவும், கல்விரீதியாகவும் பிற்படுத்தப்பட்டிருக்கும் வகுப்பினர் வரவேற்கக்கூடிய நல்ல அம்சங்கள் பலவற்றைப் பெற்றிருக்கிறது. அதேபோன்று எதிர்காலத்தில் சில ஐயுறவுகளை உருவாக்கக்கூடிய அம்சங்களும், சில பகுதிகளில் பொருள் தெளிவின்மையும் காணப்படுகின்றன.  இந்தச் சட்டமுன்வடிவைக் கண்ணை மூடிக்கொண்டு விமர்சிப்பது, சமூக ரீதியாகவும், கல்விரீதியாகவும் பிற்படுத்தப்பட்ட வகுப்பினருக்குப் பயன் தராது என்பதே என் கருத்தாகும்.  அதே சமயத்தில், இதர பிற்படுத்தப்பட்ட வகுப்பினர்களின் நலன்களைப் பாதுகாப்பதற்காக, ஐயுறவுகளை ஏற்படுத்தக்கூடிய அம்சங்களைச் சரிப்படுத்திட வேண்டியதும், தெளிவற்றிருக்கக் கூடியவற்றை தெளிவுபடுத்திட வேண்டியதும் அவசியமாகும்.

நான் அரசமைப்புச் சட்டத்தில் மிகவும் முக்கியமான அம்சமாக விளங்கும் 338B (5), (a), (b), (c), (d) மற்றும் (e) ஆகிய பிரிவிற்கு நேரடியாகவே வருகிறேன்.  இது, இதர பிற்படுத்தப்பட்ட வகுப்பினர்களின் நீண்ட கால விருப்பமாகும். பிற்படுத்தப்பட்ட வகுப்பினர்களுக்கான தேசிய ஆணையம், சமூக ரீதியாகவும், பொருளாதார ரீதியாகவும் பிற்படுத்தப்பட்டவர்களுக்கான  நாடாளுமன்ற உறுப்பினர்களின்  அமைப்பு, தலித்துகள்/பழுங்குடியினர்களுக்கான நலன்கள் குறித்து துறைசார்ந்த நாடாளுமன்ற நிலைக்குழு ஆகியவை இந்தப் பிரிவை வலுப்படுத்த வேண்டும் என்று கோரி வருகின்றன.  நேரமின்மை காரணமாக, இதன்மீது ஒவ்வொரு பத்தியாக எடுத்துக்கொண்டு பேச நான் விரும்பவில்லை.

இதில் மூன்று அல்லது நான்கு ஆக்கபூர்வமான அம்சங்கள் இருக்கின்றன. நேரமின்மை காரணத்தால் நான் அதற்குள் பத்தி, பத்தியாக செல்ல விரும்பவில்லை.  ஆணையம்/நடுவர் மன்றங்களின் அறிவுரை சாதாரணமாக மத்திய அரசைக் கட்டுப்படுத்தும் என்கிற உச்சநீதிமன்றத்தின் கட்டளை பிற்படுத்தப்பட்ட வகுப்பினரின் தேசிய ஆணையச் சட்டத்தில் மீளவும் எடுத்துப் பதிவுசெய்யப்பட்டிருக்கிறது. அது, இப்போது கொண்டுவரப்படக்கூடிய சட்டமுன்வடிவிலும் இடம் பெற வேண்டும். இது தொடர்பாக உச்சநீதிமன்றம் பிறப்பித்த கட்டளை தொடர வேண்டும். அது இந்த சட்டமுன்வடிவில் இல்லாதது மிகவும் ஆழமான  இடைவெளியாகும். இது சரி செய்யப்பட வேண்டும்.  

மற்றுமொரு மிக முக்கியமான ஒன்று இந்த ஆணையத்தின்  வல்லுநர் குழு சம்பந்தப்பட்டதாகும். இந்த வல்லுநர் குழு உச்சநீதிமன்றத்தின் கட்டளைகளைப் பூர்த்திசெய்யக்கூடிய விதத்தில் அமைந்திருக்க வேண்டும். மண்டல் கமிஷன் தீர்ப்பில் உச்சநீதிமன்றம், தற்போது பிற்படுத்தப்பட்ட வகுப்பாக இல்லாதவற்றை நீக்கிடவும், புதிதாக சிலவற்றை சேர்த்திடவும் கட்டளையிட்டிருந்தது. அவற்றை பத்தாண்டுகளுக்கு ஒருமுறை மறு ஆய்வு செய்திட வேண்டும் என்றும், உடனடியாக அல்ல என்றும் கூறியிருந்தது. மத்திய  அரசாங்கம், பத்தாண்டுகள் கழித்து, பட்டியல்களில் திருத்தங்களை செய்வது தொடர்பாக, நடவடிக்கைகள் எடுத்து அவ்வாறு திருத்திய பட்டியலை நாடாளுமன்றத்தின் ஒப்புதலுக்குக் கொண்டுவர வேண்டும் என்றும் கூறியிருந்தது.  அரசமைப்புச் சட்டத்தின் 342A சமூக ரீதியாக, பொருளாதார ரீதியாக மற்றும் கல்விரீதியாக உள்ள  பிற்படுத்தப்பட்ட வகுப்பினர்களின் பட்டியல் சம்பந்தமான குடியரசுத் தலைவரின் அறிவிக்கை மற்றும் அதனைத் தொடர்ந்து நாடாளுமன்றத்தால் சேர்க்கப்பட்ட அல்லது விடுவிக்கப்பட்டவற்றை  தொடர்பாக மாநில  அரசுகளுக்கு உள்ள உரிமைகளை திரும்பப் பெறுகிறது.  அரசாங்கம் இதனை மறுத்திருக்கிறது. மாநில அரசுகளின் உரிமைகள் இந்தச் சட்டமுன்வடிவால் பாதிக்கப்பட வில்லை என்கிறது. அரசாங்கத்தின் இந்தக் கருத்துக்களை இந்தச் சட்டமுன்வடிவின் ஷரத்துக்களை ஆய்வுசெய்வதன் மூலம் நியாயப்படுத்தப்பட வேண்டியது தேவை. 342A பிரிவைப் படித்தோமானால்,  சமூகரீதியாக, பொருளாதார ரீதியாக மற்றும் கல்வி ரீதியாக பிற்படுத்தப்பட்டவர்கள் பட்டியலை அறிவிக்கும் அதிகாரம் குடியரசுத் தலைவரையே சாரும். அதாவது, மத்திய அரசும் அதன் அமைச்சரவையையுமே சாரும்.  அமைச்சரவையின் அறிவுரையின்படிதான் குடியரசுத்தலைவர் செயல்பட முடியும்.  அதனைத் தொடர்ந்து பட்டியலில் ஏதேனும் மாற்றம் கொண்டுவர விரும்பினால்  அதனை நாடாளுமன்றத்தின் மூலம் கொண்டுவர முடியும். இது தற்போது மாநில அரசாங்கங்களுக்கு மாநில அரசாங்கங்களில்  வேலைகளுக்கு இடஒதுக்கீடு செய்வதற்கு உள்ள உரிமைகளை  நீக்கிவிடுகிறது.  இது ஒருபக்கத்தில், சமூகரீதியாகவும், பொருளாதாரரீதியாகவும், கல்விரீதியாகவும் பிற்படுத்தப்பட்டுள்ள வகுப்பினரின் பிரச்சனையாகும், மறுபக்கத்தில் மாநில அரசுகளுக்கும் மத்திய அரசுக்கும் இடையேயுள்ள பிரச்சனையாகும்.  

அநேகமாக அனைத்து மாநிலங்களிலும் மத்திய அரசின் பட்டியலும், மாநில அரசின் பட்டியலும் ஒத்துப்போகும். பல மாநிலங்களில் வித்தியாசம் கிடையாது. ஒருசில மாநிலங்களில் ஆதிக்க சாதியினரின் நிர்ப்பந்தங்களின்காரணமாக ஆட்சியாளர்கள் சில மாற்றங்களைக் கொண்டு வந்திருக்கிறார்கள். அவை, உச்சநீதிமன்ற மற்றும் உயர்நீதிமன்ற நீதிபதிகள் மற்றும் புகழ்பெற்ற மேதைகளால் பரிந்துரைக்கப்பட்டவைகளைக் கூட நிராகரித்திருக்கின்றன. ஆதிக்க சாதியினரின் நிர்ப்பந்தங்களுக்குக் கட்டுப்பட்டு மாற்றங்களைச் செய்த மாநில அரசாங்கங்களை நான் பட்டியலிட முடியும்.

இந்தக்குழுவில் ஒரு பெண் உறுப்பினர் இருக்க வேண்டும், ஒரு பிற்படுத்தப்பட்டவர் இருக்க வேண்டும்.  சிறுபான்மையினத்தவர் ஒருவர் இருக்க வேண்டும். இந்தக் குழு சமூகரீதியாக, பொருளாதார ரீதியாக பிற்படுத்தப்பட்டவர்களின் பிரச்சனைகளைப் பார்க்க வேண்டும்.

ஏற்கனவே முற்படுத்தப்பட்ட இனத்தினரிடமிருந்து நிர்ப்பந்தம் இந்த அரசுக்கு இருக்கிறது. வாக்கு வங்கி அரசியல் இங்கே செயல்பட்டுக்கொண்டிருக்கிறது. வாக்குகளைப் பெறுவதற்காக சில மாநில அரசுகள் மத்திய அரசாங்கத்தில் செல்வாக்கு பெற்றிட முயற்சிக்கலாம். இதற்கு மத்திய அரசு இடம்கொடுக்கக்கூடாது. ஆணையம் இருக்க வேண்டும்.

நான் இந்த விவாதத்தை முடிக்கும் தருவாயில், அமைச்சர் பூபேந்திரஜிக்கு ஒன்றைச் சொல்லிக்கொள்ள விரும்புகிறேன். நான் ஆளும் கட்சியினரைப் பார்த்து ஒன்று  கேட்க விரும்புகிறேன். அரசாங்கத்தில் ஜனசங்கம் இருந்தபோது அவர்கள் என்ன செய்தார்கள்? பீகாரிலும், உத்தரப்பிரதேசத்திலும் இதர பிற்படுத்தப்பட்ட வகுப்பினருக்காக ஏதாவது செய்திருக்கிறீர்களா?  அவர் எதையும் பரிசீலிக்கவில்லை. (குறுக்கீடு). நீங்கள் சுய விமர்சனத்தை ஏற்றுக்கொள்ள வேண்டும். இன்றைய பிரதமர் குறித்து நிறையவே பேசுகிறீர்கள். வாஜ்பாயிஜி இருந்தபோது என்ன செய்தீர்கள்? மண்டல் கமிஷன் அறிவிக்கப்பட்டபோது உங்கள் நடவடிக்கை எவ்வாறிருந்தது? நீங்கள் ரத யாத்திரையைத் தொடங்கினீர்கள். (குறுக்கீடு). நீங்கள் சமூகரீதியாக, பொருளாதார ரீதியாக பிற்படுத்தப்பட்ட வகுப்பினருக்கு எதுவுமே செய்ததில்லை. (குறுக்கீடு). அந்தப் பாதையில் போகாதீர்கள். பாதையை மாற்றிக் கொள்ளுங்கள். இந்தச்சட்டமுன்வடிவிற்கு, நான் ஒரு திருத்தம் கொடுத்திருக்கிறேன். இதனை அமைச்சர் பரிசீலிக்க வேண்டும் என்று விரும்புகிறேன். மிகவும் நன்றி.”

இவ்வாறு டி.கே.ரெங்கராஜன் பேசினார்.

(தமிழில்: ச.வீரமணி)

மார்க்சிஸ்ட் கம்யூனிஸ்ட் கட்சியின் மத்தியக்குழு அறிக்கை

மார்க்சிஸ்ட் கம்யூனிஸ்ட் கட்சியின் மத்தியக்குழு அறிக்கை

புதுதில்லி,

மார்க்சிஸ்ட் கம்யூனிஸ்ட் கட்சியின் மத்தியக்குழுக் கூட்டம் ஜூலை 24-26 தேதிகளில் புதுதில்லியில் உள்ள மத்தியக்குழு அலுவலகமான ஏ.கே.கோபாலன் பவனில் நடைபெற்றது. அதனைத்தொடர்ந்து மத்தியக்குழு சார்பில் வெளியிடப்பட்டுள்ள அறிக்கையில் கூறப்பட்டிருப்பதாவது:

அனைத்து முனைகளிலிருந்தும் மக்கள் மீதான தாக்குதல்கள்

பாஜக தலைமையிலான அரசாங்கத்தால் மக்களில் பெரும்பான்மை யவர்களின் வாழ்வாதாரங்களின் மீது அனைத்து முனைகளிலிருந்தும் தாக்குதல்கள் தொடுக்கப்பட்டு வருவதைப் பார்த்துக் கொண்டிருக்கிறோம். குறிப்பாக, நவீன தாராளமயப் பொருளாதாரத் தாக்குதல்கள் மக்களில்  பெரும்பகுதியினரை  சொல்லொண்ணான துன்ப துயரங்களுக்கு ஆழ்த்தி இருக்கின்றன, பசுப்பாதுகாப்பு  போன்ற தனியார் ராணுவத்தினரால் தலித்துகள் மற்றும் முஸ்லீம்கள் மீதான மதவெறித் தாக்குதல்கள் கூர்மையடைந்திருக்கின்றன, மக்களின் ஜனநாயக உரிமைகள் மீது மேலும் எதேச்சாதிகாரமான முறையில் தாக்குதல்கள் தொடுக்கப்பட்டிருக்கின்றன, நாடாளுமன்ற அமைப்புகளின் செயல்பாடுகளே அரித்து வீழ்த்தப்பட்டிருக்கின்றன. இவ்வாறு நான்கு முனைகளிலும் தாக்குதல்கள் தொடுக்கப்பட்டிருப்பதோடு, ஆட்சியாளர்கள் அமெரிக்க ஏகாதிபத்தியத்தின் இளைய போர்த்தந்திர பங்காளியாக தன்னை மாற்றிக்கொண்டு, அதன் காரணமாக நம் அயல்துறைக் கொள்கையிலேயே மாற்றத்தைக் கொண்டு வந்திருப்பதை தெள்ளத்தெளிவாகப் பார்க்கின்றோம்.

அதிகரித்துவரும்  சகிப்புத்தன்மையின்மை:

பாஜக, நாடு முழுதும் மதவெறித் தீயை கூர்மைப்படுத்துவதன்முலம் தன்நிலையை ஒருமுகப்படுத்திக்கொள்ள முடிந்திருக்கிறது. நாடாளுமன்ற ஜனநாயக அமைப்பின்கீழ் இயங்கும் அனைத்து நிறுவனங்களும் மதவெறிபிடித்த நபர்களால் நிரப்பப்பட்டு வருகின்றன. இந்தியத் தொல்பொருள் ஆய்வுத்துறை போன்ற அமைப்புகள் உட்பட கல்வி மற்றும் ஆராய்ச்சி நிறுவனங்கள்  அனைத்தும் ஆர்எஸ்எஸ் நபர்களால் நிரப்பப்பட்டு, மதவெறித்தீயைக் கூர்மைப்படுத்தும் விதத்தில் வரலாறே மாற்றி எழுதப்பட்டு வருகிறது.  பொது நிறுவனங்கள் அனைத்திலுமே மதவெறித் தீயை விசிறிவிட முயற்சிகள் மேற்கொள்ளப்பட்டிருக்கின்றன.  தாகூர், கலிப், டிங்கர், அவதார் சிங் பாஷ் போன்றவர்கள் குறித்த விவரங்களையும், முகலாயர்களை புகழ்ந்துரைத்திடும் உருது வார்த்தைகளையும் என்சிஇஆர்டி பாடப்புத்தகங்களிலிருந்து நீக்கி புத்தகங்களை ‘ஞானஸ்நானம் செய்திடவேண்டும்’ என்று ஆர்எஸ்எஸ் கூறிவருகிறது. நோபல் பரிசு பெற்ற அமர்த்யா சென் குறித்த ஓர் ஆவணப்படத்தில் வரும் ‘பசு’, ’குஜராத்’, ’இந்துத்துவா’ போன்ற வார்த்தைகளை நீக்கவேண்டும் என்று கூறி, அப்படத்தைத் திரையிடக்கூட தணிக்கை வாரியம் மறுத்திருக்கிறது. நாட்டில் சகிப்புத்தன்மையின்மை இவ்வாறு மிகவும் கூர்மையாக வளர்ந்துவரும் சூழல் இருந்துவருகிறது.

இதுபோன்ற தனியார் ராணுவங்கள்,  அதிலும் குறிப்பாக பசுப்பாதுகாப்புக் குழுக்கள் தடை செய்யப்பட வேண்டும் என்று மார்க்சிஸ்ட் கம்யூனிஸ்ட் கட்சி கோரி இருக்கிறது.    

கால்நடை வர்த்தகத்திற்குத் தடை விதித்த அரசாங்கத்தின் அறிவிக்கைக்கு, சென்னை உயர்நீதிமன்றம் பிறப்பித்த தடை ஆணையைத் தொடர்ந்து,  தற்போது உச்சநீதிமன்றமும் தடையாணை பிறப்பித்திருக்கிறது. பாஜக அரசாங்கம், உச்சநீதிமன்றத்திடம் மேற்படி அறிவிக்கையைத் திருத்தம் செய்து, மீளவும் நீதிமன்றத்திற்கு வருவோம் என்று கூறியிருக்கிறது. எந்தவிதமான திருத்தத்திற்கும் தேவையே இல்லை. இந்த அறிவிக்கை முற்றிலுமாக விலக்கிக் கொள்ளப்பட வேண்டியதாகும்.  

விவசாய நெருக்கடி:

இந்தக்கால கட்டத்தில், வேளாண் நெருக்கடி உக்கிரமடைந்திருக்கிறது. விவசாயிகளின் தன்னெழுச்சியான மற்றும் அமைப்புரீதியான எதிர்ப்புக் கிளர்ச்சிகள் நாட்டின் பல பகுதிகளிலும் வெடித்தெழுந்து வருகின்றன. அதிகரித்து வரும் விவசாயிகளின் தற்கொலைகள் இத்தகைய கிளர்ச்சிகளைக் கிளர்ந்தெழச் செய்கின்றன. மத்தியப்பிரதேசத்தில் மண்ட்சர் என்னுமிடத்தில் கிளர்ச்சியாளர்களுக்கு எதிராக மேற்கொள்ளப்பட்ட துப்பாக்கிச்சூடு, மகாராஷ்ட்ரா மாநிலத்தில் விவசாயிகளால் அறிவிக்கப்பட்ட பொது வேலை நிறுத்தம் போன்றவை விவசாய நெருக்கடியை நாட்டின் ஒட்டுமொத்த கவனத்திற்கும் எடுத்துச் சென்றுள்ளன.

மோடி அரசாங்கம், விவசாய விளைபொருள்களுக்கு, அரசு நிறுவனமான வேளாண் பொருள்கள் உற்பத்திச் செலவினம் மற்றும் விலை தொடர்பான ஆணையம் நிர்ணயிக்கும் உற்பத்திச் செலவினத்தைவிட ஒன்றரை மடங்கு  குறைந்தபட்ச ஆதார விலை அளித்திடுவோம் என்று அளித்த தேர்தல் உறுதிமொழியை நடைமுறைப்படுத்தாமல் விவசாயிகளுக்கு துரோகம் செய்திருக்கிறது.  

இவ்வாறு இந்த அரசாங்கம் கடந்த மூன்றாண்டுகளாக விவசாயிகளுக்கு துரோகம் செய்துள்ள நிலையில், விவசாயிகளுக்கு மேற்கண்ட விதத்தில் குறைந்தபட்ச ஆதார விலை நிர்ணயிக்கும் உரிமையை அளித்து நாடாளுமன்றத்தில் சட்டம் இயற்றிட வேண்டும். இதன்பொருள் என்னவெனில், விவசாயிகள் தாங்கள் விளைவித்த பொருள்களைக் கொண்டுவந்தால், அரசாங்கம் சட்டத்தின்படி  அதனைக் குறைந்தபட்ச ஆதார விலையுடன் கொள்முதல் செய்து கொள்ள வேண்டும்.

அதிகரித்து வரும் வேலையின்மை:

ரூபாய் நோட்டுகளை செல்லாது என்று அறிவித்ததானது, நாட்டில் முறைசாராத் தொழில்களில் ஈடுபட்டிருப்போரின் வாழ்வாதாரங்களை முழுமையாக சிதறடித்துவிட்டதால், தினக்கூலி மற்றும் வாரக்கூலி தொழிலாளர்களின் வாழ்க்கை வீதிகளில் தூக்கி எறியப்பட்டுவிட்டன. 2016 ஜனவரிக்கும் ஏப்ரலுக்கும் இடையேயும், மற்றும் 2017 ஜனவரி – ஏப்ரலுக்கு இடையேயும் அமைப்பு சார் வேலைவாய்ப்புகள்கூட 93 மில்லியனிலிருந்து, 86 மில்லியன் வரையிலும் வீழ்ச்சி அடைந்திருப்பதாக, அதாவது முன்பு வேலை பார்த்தவர்களில் 70 லட்சம் பேர் தற்போது வேலையிழந்துவிட்டதாக இந்திய பொருளாதாரத்தைக் கண்காணித்து வரும் மையத்தால் (CMIE-- Centre for Monitoring Indian Economy) குறிப்பிடப்பட்டிருக்கிறது. மகாத்மாகாந்தி தேசிய கிராமப்புற வேலைவாய்ப்பு உத்தரவாதத் திட்டத்தின்கீழ் ஒதுக்கப்பட வேண்டிய ஒதுக்கீட்டுத்தொகை தொடர்ந்து வெட்டப்பட்டுக் கொண்டிருக்கிறது.  இதன் பொருள் கிராமப்புற வேலைவாய்ப்புகள்  மேலும் வீழ்ச்சியடைந்துகொண்டிருக்கின்றன என்பதேயாகும். கிராமப்புற இந்தியாவில் புதிய வேலைவாய்ப்புகளுக்கு வாய்ப்பே இல்லை என்றே அறிக்கைகள் கூறுகின்றன.

மோடி அரசாங்கம், தாங்கள் ஆட்சிக்கு வந்தால்,  ஒவ்வோராண்டும் இரண்டு கோடி வேலைவாய்ப்புகளை உருவாக்குவோம் என்று உறுதி அளித்திருந்தது. ஆனால் அதற்குப் பதிலாக, நாம் இன்றைக்குப் பார்ப்பது என்னவென்றால், வேலைவாய்ப்புகள் மிகப்பெரிய அளவில் வீழ்ச்சி  அடைந்து கொண்டிருக்கின்றன. ஒவ்வோராண்டும் இளைஞர்கள் பட்டாளம் சுமார் 1.5 கோடி பேர் வேலைவாய்ப்பு சந்தையில் தங்களை இணைத்துக்கொண்டிருக்கக்கூடிய நிலையில், இத்தகு நிலைமை இளைஞர்கள் மத்தியில் அமைதியின்மையை உருவாக்கிக் கொண்டிருக்கிறது.

பொதுத்துறை நிறுவனங்களைத் தனியாருக்குத் தாரை வார்த்தல்:

நிட்டி ஆயோக் பரிந்துரையின்படி, இந்த பாஜக அரசாங்கம் பொதுத்துறை நிறுவனங்களைப் பெரிய அளவில் தனியாருக்குத் தாரைவார்த்திட நடவடிக்கைகள் எடுத்துக்கொண்டிருக்கின்றன. நிட்டி ஆயோக் முழுமையாக கார்ப்பரேட்டுகளால் கடத்திச் செல்லப்பட்டுவிட்டது. அதன் முன்மொழிவுகள் அனைத்துமே நவீன தாராளமயப் பொருளாதார சீர்திருத்தங்கள் மற்றும் சர்வதேச நிதி மூலதனம் மற்றும் உள்நாட்டு பெரும் கார்ப்பரேட்டுகளின் மூலதனத்திற்கு சேவகம் செய்யக்கூடிய விதத்திலேயே அமைந்திருக்கின்றன.  நாட்டின் பிரதானமான பொதுத்துறை சொத்துக்களை அந்நிய மற்றும் உள்நாட்டு தனியார் மூலதனத்திற்கு அடிமாட்டு விலைக்கு அளிப்பதற்கு முன்வந்துள்ளது, சமீபத்திய தாக்குதலாகும்.

அந்நிய ராணுவ தளவாடங்கள் உற்பத்தி கார்ப்பரேட்டுகளுக்கு அள்ளிக்கொடுக்கக்கூடிய விதத்தில் ராணுவத் தளவாடங்கள் உற்பத்தி மையங்களை மிகப்பெரிய அளவில் தனியாரிடம் தாரை வார்த்திட நடவடிக்கைகள் நடந்துகொண்டிருக்கின்றன. இது, நாட்டின்  பாதுகாப்பிற்கு மிகப்பெரிய அச்சுறுத்தலை ஏற்படுத்தி இருக்கிறது.  ஏர் இந்தியா நிறுவனத்தைத் தனியாரிடம் ஒப்படைப்பதற்கான வேலைகளும் தொடங்கிவிட்டன. நாட்டு மக்களை உயிரோட்டமான முறையில் பிணைத்து வைத்திருக்கக்கூடிய ரயில்வேயையும் கூட தனியாரிடம் தாரை வார்த்திட நடவடிக்கைகள் மேற்கொள்ளப்பட்டு வருகின்றன. ரயில்வேயுடன் இணைந்துள்ள பல்வேறு சேவைகள்  தற்போது தனியார்  வசம் ஒப்படைக்கப்பட்டிருக்கிறது.  இவை அனைத்தும் ரயில்வேயையே தங்கள் வாழ்க்கையின் ஓட்டத்திற்கு துணையாகக்கருதி வாழ்ந்து கொண்டிருக்கும் கோடானு கோடி இந்திய மக்கள் மத்தியில் கடும் சுமைகளை ஏற்றிடும்.

நிதித்துறையில் புதிதாக இயற்றப்பட்டுள்ள நிதித் தீர்மானம் மற்றும் சேம்ப்பு இன்சூரன்ஸ் சட்டமுன்வடிவு (FRDI—Financial Resolution and Deposit Insurance Bill, 2017) மூலம் இந்த அரசாங்கமானது வங்கிகளையும், நிதித்துறை நிறுவனங்களையும் முற்றிலுமாக பொதுத்துறை கண்காணிப்பு மற்றும் சமூகக் கட்டுப்பாடுகளிலிருந்து நீக்கி இருக்கிறது.

ஆதாரும் தனிநபர் அந்தரங்கத்தைக் காப்பதற்கான உரிமையும்:

தனிநபர் அந்தரங்கத்தைக் காப்பதற்கான உரிமை குறித்த பிரச்சனையைத் தற்போது உச்சநீதிமன்றத்தின் அரசமைப்புச்சட்ட அமர்வாயம் விசாரித்துக் கொண்டிருக்கிறது. இந்த உரிமைமீது போதுமான அளவிற்கு வரம்புகள் விதிக்கப்பட்டிருப்பதாக அரசாங்கத்தின் தரப்பில் சொல்லப்படுகிறது. ஆதார்  அட்டையில் கூறப்பட்டுள்ள தனிநபர் தரவுகளை தனிநபர்களுக்கு அளிப்பது குறித்து அரசாங்கம் மிகவும் தெளிவாக வரையறுத்திட வேண்டும்.

இங்கே பிரச்சனை, ஒரு தனிநபரின் அந்தரங்கம் வெளிப்படுத்தப்படுகிறது என்பதல்ல.  பயங்கரவாதம் மற்றும் உள்நாட்டுப் பாதுகாப்புக்கு இது தேவைஎன்று அரசாங்கத்தின் தரப்பில் சொல்லப்படுகிறது. இன்றைய உலகில் இந்தப் பிரச்சனையானது, இவ்வாறான தனிநபர்களின் தரவுகளை உலக அளவில் இயங்கும் பெரும் கார்ப்பரேட்டுகள் மற்றும் இந்தியக் கார்ப்பரேட்டுகள் தங்கள் லாபங்களைப் பெருக்கிக் கொள்வதற்காகவும். தனிநபர்களைக் கசக்கிப் பிழிவதற்காகவும், பல்வேறு விதங்களில் பயன்படுத்திக் கொள்கிறார்கள் என்பதேயாகும். இவ்வாறு கார்ப்பரேட்டுகள் தனிநபர்களைச் சூறையாடுவதைத் தடுக்கக்கூடிய விதத்தில்  மக்களுக்குப் பாதுகாப்பு அளிக்க வேண்டியது அவசியமாகும். எனவேதான், தனிநபர் அந்தரங்கங்களைப் பாதுகாக்கக்கூடிய விதத்தில் புதிய சட்டம் ஒன்றை இயற்றிட அரசாங்கம் முன்வர வேண்டும் என்று நாங்கள் கோருகிறோம்.  ஆதார் தகவல்களை இணைய தளத்தில் ஜியோ நிறுவனம் பரப்பியதுபோல் எவரேனும் பரப்பினால் அவர்களுக்கு என்ன தண்டனை என்பதை அந்தச் சட்டத்தில் குறிப்பிட வேண்டும்.

கேரளம்

கேரளத்தில் இடது ஜனநாயக முன்னணி ஆட்சிக்கு வந்தபின்னர், ஆர்எஸ்எஸ் இயக்கத்தினரின் தாக்குதல்களில் 13 தோழர்கள் கொல்லப் பட்டிருக்கிறார்கள்.  200க்கும் மேற்பட்ட கட்சி உறுப்பினர்களும், ஆதரவாளர்களும் காயங்கள் அடைந்து மருத்துவமனையில் சிகிச்சை பெற்று வருகிறார்கள். 150க்கும்  மேற்பட்ட வீடுகள் மற்றும் 50க்கும் மேற்பட்ட கட்சி அலுவலங்கள் தாக்கப்பட்டிருக்கின்றன, தீக்கிரையாக்கப்பட்டிருக்கின்றன மற்றும் அடித்து நொறுக்கப்பட்டிருக்கின்றன.  

ஐக்கிய ஜனநாயக முன்னணி அரசாங்கக் காலத்திலும் நம் தோழர்கள் 27 பேர் ஆர்எஸ்எஸ் குண்டர்களால் கொல்லப்பட்டிருக்கிறார்கள். அத்தகு தாக்குதல்கள் இப்போதும் தொடர்கின்றன. அதே சமயத்தில், தங்கள் கொலைபாதக நடவடிக்கைகளையும், வன்முறை வெறியாட்டங்களையும் மூடி மறைப்பதற்காக மார்க்சிஸ்ட் கம்யூனிஸ்ட் கட்சியினர் ‘அட்டூழியங்கள்’ புரிவதாக அவதூறு செய்து வருகிறார்கள்.  

திரிபுரா

திரிபுராவில் வரவிருக்கும் சட்டமன்றத்  தேர்தலில் இடது முன்னணி அரசாங்கத்தை பலவீனப்படுத்திட வேண்டும் என்பதற்காக ஆர்எஸ்எஸ-பாஜக வகையறாக்கள் தலைகீழாக நின்று முயற்சி செய்துகொண்டிருக்கிறார்கள்.  அம்மாநிலத்தில் பழங்குடியினருக்கும், பழங்குடியினரல்லாதவர்களுக்கும் இடையே மோதலை உருவாக்கிட முயற்சிகளை உக்கிரப்படுத்திக்கொண்டிருக்கிறார்கள்.  மார்க்சிஸ்ட் கம்யூனிஸ்ட் கட்சியின் திரிபுரா மாநிலக்குழுவும், திரிபுரா மாநில அரசாங்கமும்  சமீபத்தில் திரிபுராவில் நெடுஞ்சாலையில் முற்றுகைப்போராட்டம் நடத்திய ஐபிஎப்டி (IPFT) அமைப்பினரின் போராட்டத்தை மிகவும் சாதுர்யமாகக் கையாண்டதற்கு மத்தியக்குழு தன் திருப்தியைத் தெரிவித்துக் கொள்கிறது.

பாஜக மேற்கொண்டுவரும் தாக்குதல் நடவடிக்கைகளையும், தேர்தல் தயாரிப்பு வேலைகளையும் எப்படி எதிர்கொள்வது என்பது தொடர்பாக திரிபுரா மாநிலக்குழு அளித்துள்ள அறிக்கையை மத்தியக்குழு கேட்டறிந்தது. அமைதியை விரும்பும் திரிபுரா மாநில மக்கள் பாஜகவினர் மேற்கொண்டுவரும் சூழ்ச்சி வலைகளைத் தகர்த்தெறிவார்கள் என்றும், வரவிருக்கும் தேர்தலிலும் அவர்கள் இடது முன்னணியையே மீளவும் தெரிவு செய்வார்கள் என்றும்  மத்தியக்குழு நம்புகிறது. 

மத்திய அரசின் சமீபத்திய தரவு ஒன்று, நாட்டிலேயே இரண்டு மாநிலங்கள்தான் பொது சுகாதாரம் மற்றும் கல்வியில் மிகவும் சிறந்து விளங்குவதாகவும், அவை கேரளாவும், திரிபுராவும் என்று குறிப்பிட்டிருக்கிறது.  திரிபுராவைப் பொறுத்தவரை,  அங்கே எழுத்தறிவு 96 சதவீதமாகும், மக்களின் ஆயுட்காலம் ஆண்கள் 71 ஆண்டுகள், பெண்கள் 73 ஆண்டுகளாகும். பொது சுகாதாரம் மற்றும் கல்வியிலும்  நாட்டின் மற்ற மாநிலங்களைவிட மிகவும் உயரத்தில் இருக்கிறது.  இவ்வாறு மார்க்சிஸ்ட் கம்யூனிஸ்ட் கட்சியும், இடதுசாரி அரசாங்கங்களும் அமல்படுத்தும் இத்தகைய மக்கள் ஆதரவு முற்போக்குக் கொள்கைகளைத்தான் பாஜக குறிவைத்துத் தாக்கிக் கொண்டிருக்கிறது.

மேற்கு வங்க மாநிலங்களவைத் தேர்தல்

மாநிலங்களவைக்கு மூன்றாவது முறையாக சீத்தாராம் யெச்சூரியைத் தேர்ந்தெடுக்க வேண்டும் என்று மேற்கு வங்க மாநிலக்குழு கொண்டுவந்த முன்மொழிவை, மத்தியக் குழு நிராகரித்துள்ளது.  மேற்கு வங்கத்தில் உள்ள எதிர்க்கட்சிகள் ஏற்கத்தக்க சுயேச்சை உறுப்பினரை நிறுத்தினால் அதனைப் பரிசீலிக்கலாம் என்றும் அவ்வாறில்லையேல் மேற்கு வங்க இடது முன்னணிக்குழு சார்பில் போட்டியிடுவது தொடர்பாக பரிசீலிக்கலாம் என்றும் மத்தியக்குழு கருதுகிறது.

காஷ்மீர்

ஜம்மு – காஷ்மீரில் நிலைமைகள் சீர்கேடடைந்து வருவது குறித்து மத்தியக் குழு ஆழ்ந்த கவலையை வெளிப்படுத்தி இருக்கிறது. பாஜக அரசாங்கம், காஷ்மீர் மக்களுக்கும், இந்திய நாடாளுமன்றத்திற்கும், உள்துறைஅமைச்சரின் தலைமையில்  காஷ்மீருக்குச் சென்ற அனைத்துக் கட்சி நாடாளுமன்றத் தூதுக்குழுவிற்கும் அளித்த உறுதிமொழிகளுக்குத் துரோகம் செய்துவிட்டது.   பெல்லன்குண்டுகள் பயன்படுத்த மாட்டோம், காஷ்மீர் இளைஞர்களுக்கு வேலை வாய்ப்புகளுக்கு நடவடிக்கை எடுத்திடுவோம் என்பது போன்ற நடவடிக்கைகள் மூலமாக நம்பிக்கை ஊட்டும் நடவடிக்கைகளை உடனடியாக மேற்கொள்வோம் என்று அது அறிவித்திருந்தது. அதேபோன்று காஷ்மீரில் இயங்கும் அனைத்துத் தரப்பினருடனும் பேச்சுவார்த்தைகள் நடத்திடுவோம் என்றும் வாக்குறுதி அளித்தது. ஆனால், அது கடந்த ஆறு மாதங்களில் இதில்  எதனையுமே செய்திடவில்லை. காஷ்மீர் மக்கள் அந்நியப்படுதல் அதிகமாவதற்கு இவைகள் பெரிய அளவில் பங்களிப்பினைச் செய்துள்ளன. 

அனைத்துத்தரப்பு அரசியல் சக்திகளையும், மக்கள் இயக்கங்களையும் ஒருங்கிணைத்திட மார்க்சிஸ்ட் கம்யூனிஸ்ட் கட்சியின் முயற்சிகள் தொடர்ந்திட வேண்டும் என்று மத்தியக்குழு தீர்மானித்திருக்கிறது.

கட்சியின் அகில இந்திய மாநாடு

கட்சியின் அகில இந்திய 22ஆவது மாநாட்டை 2018 ஏப்ரலில் தெலங்கானா மாநிலத் தலைநகர், ஹைதராபாத்தில் நடத்திட மத்தியக்குழு தீர்மானித்திருக்கிறது.

மத்தியக்குழு அறைகூவல்

வரவிருக்கும் காலத்தில் கீழ்க்கண்ட இயக்கங்களை நடத்திட மத்தியக்குழு தீர்மானித்திருக்கிறது.

(1)

(அ) கடன்சுமையால் தற்கொலைப்பாதைக்குத் தள்ளப்பட்டு வரும் விவசாயிகள் கடன்களை உடனடியாகத் தள்ளுபடி செய்திட வேண்டும் என்பதை வலியுறுத்தியும்,

(ஆ) விவசாயப் பொருள்களின் உற்பத்திச் செலவினத்தைவிட ஒன்றரை மடங்கு விலை வைத்து குறைந்தபட்ச ஆதார நிலை நிர்ணயம் செய்திடுவோம் என்று பாஜக அளித்த தேர்தல் வாக்குறுதியை நிறைவேற்ற வலியுறுத்தியும்,

(இ) விவசாயிகள் தாங்கள் விளைவித்த பொருள்களை குறைந்தபட்ச ஆதாரவிலையில் மத்திய அரசே கொள்முதல் செய்திட சட்டம் இயற்றிட வேண்டும் என்று வலியுறுத்தியும்,

(ஈ) இரண்டு கோடி வேலைவாய்ப்புகள் உருவாக்குவோம் என்கிற பாஜக தன் தேர்தல் வாக்குறுதியை அமல்படுத்தக்கோரியும்,

(உ) பொதுத்துறை நிறுவனங்கள் மற்றும் பொதுத்துறைசேவைகளைத் தனியாருக்குத் தாரை வார்ப்பதை நிறுத்தக்கோரியும்,

(ஊ) 2014 தேர்தலின்போது பாஜக வாக்குறுதி அளித்ததுபோல் மகளிர்க்கான  இடஒதுக்கீட்டு சட்டமுன்வடிவை நிறைவேற்ற வலியுறுத்தியும்,

வரும் 2017 ஆகஸ்ட் 15 முதல் 31 தேதிகளில் நாடு முழுதும் கிளர்ச்சி இயக்கங்களை நடத்திட வேண்டும் என்று மார்க்சிஸ்ட் கம்யூனிஸ்ட் கட்சியின் அனைத்துக் கிளைகளுக்கும் மத்தியக்குழு அறைகூவல் விடுக்கிறது. 

2. வரும் 2017 செப்டம்பர் 1 அன்று உலக அமைதி மற்றும் ஏகாதிபத்திய எதிர்ப்பு தினத்தை அனைத்துக் கிளைகளும் அனுசரித்திட வேண்டும். அன்றைய தினம் மோடி அரசாங்கம் அமெரிக்க ஏகாதிபத்தியத்திடம் சரணடைந்திருப்பதையும் அதன் இளைய பங்காளியாக மாறியிருப்பதையும் மக்கள் மத்தியில் விளக்கிட வேண்டும்.  பிரதமரின்  சமீபத்திய இஸ்ரேல் பயணம், உலக அளவில் அமெரிக்கா-இஸ்ரேல்-இந்தியா கூட்டணியை உருவாக்கிட பாஜக அரசாங்கம் நடவடிக்கைகள் எடுத்து வருதை மக்கள் மத்தியில் அம்பலப்படுத்திட வேண்டும்.

3. செப்டம்பர் மாதத்தில் நாடு முழுதும் மதவெறிக்கு எதிராக இயக்கங்களை நடத்திட வேண்டும். இதில் அனைத்து மதச்சார்பற்ற மற்றும் ஜனநாயக சக்திகளை இணைத்திட வேண்டும்.

4. செப்டம்பர் மாதத்தில் தலித்துகள் மற்றும் முஸ்லீம் சிறுபான்மையினருக்கு எதிராக அதிகரித்து வரும் தாக்குதல்களைக் கடுமையாக எதிர்த்திட வேண்டும். பசுப்பாதுகாப்புக்குழுக்களையும் ஆர்எஸ்எஸ்-ஆல் நடத்தப்படும் தனியார் ராணுவங்களையும் தடை செய்திட  வலியுறுத்தி மத்திய சட்டம் கொண்டுவர வேண்டும் என வலியுறுத்திட வேண்டும்.

(தமிழில்: ச.வீரமணி)